Seîd Dêreşî, sala 1955an li gundê Dêreşê yê qezaya Amêdiyê ji dayik bûye. Xwendina xwe ya despêkê, Qur’an û Nûbihara Ehmedê Xanî û çend kitêbên din li nik melan xwendine. Paşî sala 1968an dest bi mekteba resmî ya bi navê (Me‘hedu’l-Îslamî) kiriye.

Sala 1976an mekteba xwe bi dawî înaye. Sala 1982yan Koleja Şerî‘etê û Vekolînên Îslamî ya bi ser Zanîngeha Mustensiriyê ve, li Bexda bi dawî înaye.

Seîd Dêreşî

Sala 1986ê, bûye endamê Yekîtiya Nivîskarên Îraqê. Sala 1991ê, bûye endamê Yekîtiya Nivîskarên Kurd. Sala 1991ê, piştî serhildana Başûr, rojnameyek bi navê Botan li bajarê Dihokê derxistîye û sernivîserê wê bûye.

Ji sala 1995an heta niha li Almanya dijî. Sala 2013an, vegerîyaye Başûrê Kurdistanê û dest bi weşana kovareka dîrokî ya bi navê Dîrok kirîye û 24 jimar jê derxistine. Di sala 2019an de weşana wê bi dawî bûye.

Heta niha li ser twîjandina hin kitêb û dîwanên şa‘irên klasîk kar kiriye. Her wiha kitêb û vekolîn li ser dîroka Kurdan ya civakî û siyasî nivîsîne.

Hin ji berhemên Seîd Dêreşî ev in:

1. Qeftek ji Hozanêt Nalbendî, 1981, Bexda
2. Dîwana Feqîyê Teyran (para yekê), Bexda, 1989
3. Dîwana Weda‘î, 2002 Berlîn - Nûbihar, Stembol, 2012
4. Şevzengil (helbest), Dihok, 2002
5. Dîwana Feqîyê Teyran (tevberkar), Dihok, 2005
6. Kelhên Ava, Komeka Vekolîn û Tekstên Klasîkî, Dihok, 2005
7. Şerefnameya Şerefxanê Bidlîsî, Tercema Mela Mehmûdê Bazîdî, Dihok, 2007
8. Bermayêt Dîwana Feqîyê Teyran. Weşanên Zanîngeha Dihokê, 2011
9. Berperek ji Dîrokê, Weşanên Zanîngeha Dihok, 2011
10. Vêkêxistokêt Kurdî. Rêveberîya Çap û Belavkirinê, Dihok, 2013
11. Serbora Min ya Nivîsînê di Karwanê şi‘rê da (bîrhatin û şi‘r), Dihok, 2020
12. Demek bo Xewnêt Min (çîrok), Dihok, 2020
13. Zanistê Kelam, Vekolîn li ser Eqîda Îmanê ya Ehmedê Xanî, Dihok, 2021
14. Vekolîneka Şiroveyî li ser Nûbihara Ehmedê Xanî, Dihok 2022
15. Çend Rawestgeh di dîroka Mîrgeha Behdînan da, (li jêr çapê ye)
16. Rastîya Zimanê Kurdî. (Niha berdest e)