Hiqûqnas û wergêr Sabîr Ebdulahîzad (Saber Abdollahizad) di sala 1986an de li gundê Dizê a ser bi navçeya Mirgewera Ûrmîyeyê hatîye dinyayê. Dibistana seretayî, dibistana navîn û lîse li wê navçeyê xwendîye. Sala 2009an li Ûrmîyeyê fakulteya hiqûqê qedandîye. Piştre sala 2011ê ji bo berdewamkirina xwendina xwe diçe bajarê Tehranê dest bi xwendina lîsansa bilind a hiqûqa navnetewî dike. Sala 2014an wekî xwendekarê doktoraya Hiqûqa Navneteweyî li Zanîngeha Hemedanê tê wergirtin û di heman salê de li Zanîngeha Mihabadê dest bi dersdêrîya hiqûqê dike. Ebdulahîzad sala 2016an ji ber çalakîyên çandî û herwiha ji ber sedemên siyasî ji mamostetîya zanîngehê tê avêtin û heman salê ji ber gefên rejîma Îranê neçar dimîne ku ji Îranê derkeve.

Ebdulahîzad di qonaxa lîseyê da dest bi nivîsandina pexşan û helbestên Kurdî û Farsî dike. Sala 2006an yekem helbestên wî yên taybet ji bo zarokan di kovara zarokan a Alekokê da li Mehabadê tên weşandin. Herwiha yekem helbestên wî yên bi zimanê Farsî di rojnameya herêmî ya Dengê Ûrmîyeyê û kovara Endîşêyê Mergewer da tên weşandin. 

Xebatên Têkildarî Lîteratûra Hiqûqê

Di heyama xwandina li zanîngehê da, bala xwe dide ser lîteratûra hiqûqê û dest bi berhevkirina ferhengeke hiqûqî dike. Piştî ku penaberî Bakurê Kurdistanê dibe, yekem ferhenga wî di bin navê Ferhenga Têgihên Hiqûqa Navnetewî di sala 2018an da ji alîyê Weşandaneya Sîtavê ve tê weşandin. Ji sala 2017an şûnde wekî yek ji endamên çalak di Komxebata Hiqûqê da cih digire. Wê komxebatê di bin seywana Weqfa Mezopotamyayê da amadekarîye ferhengeke hiqûqê dikir. Di encama çend sal ked û têkoşîna komxebatê da, pirtûka Ferhenga Têgihên Hiqûqê di sala 2020î de tê weşandin ku Ebdulahîzad jî yek ji edîtorên wê ferhengê ye. Komxebata Hiqûqê sala 2021ê cardin çalak dibe û dest bi amadekarîya ferhengekî berfirehtir a hiqûqê dike. Ew xebat niha jî berdewam dike. Ji sala 2016an heya roja îro bi dehan gotar û nivîsarên wî di kovar û rojnameyên mîna Agirî, Folklor û Ziman, Kurdistanmedya, Destar, Dadistan, Aşdad, Tîşk û hwd da hatine weşandin. Herwiha cihê amajeyê ye ku ew beşdarî bi dehan panel û semînarên hiqûqî bûye.

Xebatên Wergerê

Sala 2020î yekem wergera wî an ku Dîroka Erdelanê ji alîyê Weşanxaneya Sîtavê ve hatîye weşandin ku berhama dîroknasa navdar Mestûre Kurdistanî ye. Herwiha sala 2021ê tevî wergêrê kurd Muhsîn Ozdemîr pirtûka pîroz a yarsanan an ku “Nameya Serencam yan Kelama Xezîneyê” wergerandîye ser zaraveya Kurmancî. Ebdulahîzad Rojnameya Kurdistanê ku zimanhalê Komara Kurdistanê bûye, ji zaraveya Soranî wergerandîya ser zaraveya Kurmancî. Ew xebata wî ya wergerê di destê weşanê da ye. Herwiha cihê amajeyê ye ku hin xebatên wî yên wergerê di kovarên wekî Destar, Dadistan û rojnameyên mîna Le Monde Diplomatique-Kurdî da hatine weşandin.

Berhemên Sabîr Ebdulahîzad:

- Ferhenga Têgehên Hiqûqa Navnetewî 1, ferheng, Weşanên Sîtav, 2018

- Ferhenga Têgihên Hiqûqê, ferheng, wek Komxebat, Weqfa Mezopotamyayê, 2019

- Dîroka Erdelanê. Mestûre Kurdistanî,  werger: Sabîr Ebdulahîzad, Weşanên Sîtav, 2020

- Nameya Serencam yan Kelama Xezîneyê, Sidîq Sefîzade(Borekeyî), werger: Muhsîn Ozdemîr & Sabîr Ebdulahîzad, Weşanên Sîtav, 2021