Mehmet Çaglayan

Mehmet Çaglayan di sala 1923yan de li gundê Ardgunk ya bi ser parêzgeha Mûşê ve hatîye dinyayê. Zarokatîya xwe di medreseya bavê xwe Melle Mistefa Efendi de derbas kirîye. Çaglayanê ku yek ji hiqûqnasên herêmê yê qedirbilind bû, piştî ku demekê li cem bavê xwe xwendina Qur’an, ferheng, rêziman û hevoksazîyê kir, çû Medreseya Norşînê ya Bedlîsê. Li vir li ba şêx Taqîyeddîn û şêx Maşûq ders sitendîye. Piştî neh salan ji perwerdehiya giran a domdar, çûye çar salan leşkerî kirîye.

Piştî vegera ji leşkeriyê dest bi xebatê kirîye da ku çar salên leşkeriyê telafî bike û tiştên ku ji bîr kiribûn nû bike. Di vê heyamê de li cem gelek alimên navdar ên wekî nemir Îbrahîm Efendî, Muhammed Mahfuz Efendî, Yusuf Efendi perwerdehîya xwe domandîye. Di vê navberê de ji bo lêkolînên li ser ilmên fiqh, tefsîr û hedîsê li gelek welatên misilman gerîyaye û beşdarî dersên alimên rêzdar bûye.

Dema ku bavê wî di sala 1949an de koça dawî dike, vedigere medreseya bavê xwe ya li Gundê Xaşxaltaxê û heta sala 1954an li wir ders daye. Paşê dibe muftî û li cihên cuda wezîfê dike û di sala 1979an de ji Niğdeyê teqawît dibe. Dûra li Stenbolê niştecîh bûye. Di kovar û rojnameyan de nivîs û lêkolîne xwe weşandinê. Cihêreng berhemê wî hene.

Berhemên Mehmet Çağlayan ê ku hatine weşandin:

- İslam’da Mezhepler(Di Îslamê de Mezheb), Weşanên Kayihan, 2009

- İslam’da Eğitim(Di Îslamê de Perwerdehî), Cihad Kitabevî(Pirtûkxaneya Cîhadê)

- İslamî Harekette Ulema(Di Tevgera Îslamî de Ûlema), Weşanên Şûra, 1991

- Ehli Sünnet ve Akaîdî( Ehlî Sunnet û Eqaîdî), Weşanên Kayihan, 2009

- Fıkıh ve İçtahad (soruşturma), Fiqh û Îctehad (lêkolîn), Weşanên Sor, 1988

- Şark Uleması(Ulemaya Rojhilat), Weşanên Çaglayan

Berhemên Mehmet Çağlayan ê ku nehatine weşandin:

- Şafi Tabakatı(Tabaqatê Şafiî)

- İslam ve Çağdaş Hukuk(Îslam û Hiqûqa Hemdem)

- İslam Hukukunda Sünnetin Yeri(Cihê Sunnetê di Şerîeta Îslamê de)

ÇAVKANÎ

Lêkolînên Kurdî, Dilazad ART, Zanîngeh, 2013