Nivîskar û lêkolînvan Heyder Omer, di sala 1952yî de li gundê Qizilbaşa, herêma Çiyayê Kurmênc (Efrîn) ji dayikê bûye. Li gundê Kotana xwendina seretayî û ya navîn li bajarê Efrîn, navenda herêma Çiyayê Kurmênc bi dawî tîne, di sala 1970yî de jî lîsê bi dawî dike.

Di sala 1974an de lîsansa wêje û zimanê Erebî ji Zanîngeha Helebê wergirt, di sala 1978an de dîploma zanista perwedeyê ji Zanîngeha Şamê wergirt, di pergala perwerdeyê de wek mamosteyê wêjê û zimanê Erebî li dibistanên parezgeha Helebê kar kir.

Di sala 1999an de neçarî koçberîyê dibe, li welatê Elmanya bi cih dibe û karê xwe yê perwerdeyê li dibistanên Elmanî didomîne.

Heyder Omer ji sala 1974an de bi wêjeya Kurdî mijûl dibe. Di ber karê xwe re di meydana wêjeya Kurdî de dixebite, ku bû endamê desteya sernivîsa kovara PIRS, ya ku li Sûrîyê derdiket û ya kovara PÊNÛS ya ku li Elmanya derdiket. Her weha dibe serokê desteya kovara PÊL ya ku li Elmanya derdiket. Gelek gotar û lêkolînên rexneya wêjeyê di hersê kovaran û di hin rojname û kovarên din de û di malperên Kurdî de diweşîne.

Heyder Omer ji dema xortanîya xwe de dikeve nav qada xebata siyasî û civakî, sala 1969 li gel hin xortên herêma Ҫiyayê Kurmênc, kulûba Efrîn dadimezirîne. Ev kulûb çar salan li Efrînê gelek karên civakî û hunerî dike, lê sala 1974an bi fermana hukûmeta Sûrî tê girtin.

Heyder Omer, sala 1993yî li gel hinek wêjevan û helbestvanan, festîvala helbesta Kurdî li dar dixe. Ev festîval hîn jî sal bi sal tê lidarxistin. Her wiha endamê komîteya xelata Osman Sebrî ye ku ev xelat ji bo dostên gelê Kurd yê ku ji bo Kurdan xebatên giring kirine tê pêşkêşkirin. Hersê dostên Kurdan Îsmaîl Beşîkçî, Danîel Mîtterand û Dr. Munzir El-Fedil ev xelat wergirtine.

Heyder Omer endamê Komeleya Mamosteyên Kurd e li eyaleta Niedersachsen / Elmanya û endamê Komeleya Perwerde û Zanistan li Elmanya ye. Ji bilî pirtûkên wî yê çapkirî, zêdetirî 7 pirtûkên din li ber destên wî ne û çend projeyên wî yên wêjeyî hene.

Pirtûkên Heyder Omer yên hatine çapkirin:

1-Ehmedê Xanî di Dastana Helbestî ya Mem û Zîn de, rexne, bi zimanê Erebî, 1991

2- Feqîyê Teyran, Jiyan, Helbest û Helbestvanî. rexne, bi zimanê Erebê, 1993

3- Di Tirzûwê de, rexne, bi zimanê Erebî, 1998

4- Piçek Ronahî, Ji Bîranînên Evdilrezzaq Bedirxan, werger ji Kurdî bo Erebî, 2000

5- Cegerxwînê Çîroknivîs, rexne, bi zimanê kurdî, 2003

6- Osman Sebrî, Helbestvan û Nivîsevan, rexne, bi zimanê Kurdî, çapa yekem, li Berlînê, 2004; çapa duwem li Silêmaniyê / Kurdistanê, 2006

7- Ehmedê Xanî, Raman û Huner, rexne, 2007

8- Vedenga Hestan (hunera helbestê), 2014

9- Kurdistan Berî Her Tiştî- pirtûka Dr. Ehmed Xelîl, werger ji Erebî bo Kurdî, 2015, Amed

10- Kurtedîroka Wêjeya Folklora Kurdî, 2018