Amadekarîya
Nivîskar: Jîyar Cîhanferd
Helbestvan Fatma Savci di sala 1974an de, li gundê Girêmîra ku bi ser Nisêbînê ve ye, hatîye dinyayê. Lê bi eslê xwe ji gundê Hêştrekê ye ku girêdayî Midyadê ye. Dibistana seretayî li Girêmîra xwend. Di şazdeh salîya xwe de bû aktivîst û tevî têkoşîna azadîya Kurdistanê bû. Di 1992yan de, ji bo raman û çalakiyên xwe yên siyasî hat girtin. Ji bo di dadgehê de parastina doza xwe bi Kurdî kir, cezayê wê girantir bû û panzdeh sal ceze danê. Heya cezê wê qedîya, li Tirkiyê û Kurdistanê heşt carî girtîgehên wê guhertin, di dawîya 2003yan de ji zindanê azad bû.
Li girtîgehê wê nivîsandina helbestan domand û bi awayekî veşartî gihand kovar û rojnameyên Kurdî ku li derve dihatin çapkirin. Piştî ji girtîgehê derket pirtûkên wê yên helbest, pexşan û çîrokan hatin çapkirin. Piştî azad bû, wek rojnameger di rojname, kovarên civakî û wêjeyî de xebitî. Ji bo hin kanalên televizyonên Kurdî dokumenterên çandî û civakî çêkirin. Wek endama Enstîtuya Kurdî ya Stembolê dersên Kurdî da zarok û mezinan.
Fatma Savci heman demê wek aktivistekê der barê wêje, ziman, çand û hunera Kurdî ya di binê zilm û çewisandina desthilatdaran de axivî û beşdarî gelek konferens û semîneran bû. Piştî ku dozek li ser wê vebû û ew ji bo helbestên xwe yên ku tê de behsa azadîyê dike hat darizandin, biryar da ji welatê xwe koç bike. Fatma niha li Swêdê dijî, ew li dibistanê wek mamoste kar dike û bi zimanê Kurdî û Swêdî alîkarîya zarokan dike.
Heşt berhemên Fatma Savci hatine çapkirin:
Helbest: Gulên Qasid, Xewnên Zîvîn, Bîra Birînê, Dotmara Lal, Danê Baranê
Pexşan: Şewq û Payiz
Çîrok: Ristika Morîkan
Rojnivîsk: Ber bi Binxetê ve (Rojnivîska Rojava)
DIJE DEJ- Antolojîya Çîrokên Kurdî, Jîyar Cîhanferd-Anîsa Caferî Mehr, PENa Kurd, 2022
https://www.avestakitap.com/fatma-savci#
Nivîsén tékildar
